U-15 TL hatun U-15 Malysia 3-2

DILI - Ekipa U-15 Timor-Leste sai vensedor iha jogu Asean Championship hasoru ekipa U-15 Malaysia. Iha jogu ne’ebe halao iha Estadiu Municipal Dili, sabadu (13/07), Timor-Leste konsege manan ho valor 3-2. Iha primeiru parte, foin tama ba minutu 6 deit, adeptu sira hakfodak tanba jogador U-15 husi TL, Ricardo Correia Mendonsa (19) hetan oportunidade hodi kusa uluk golu ida ba baliza ekipa Malaysia nian 1-0. Golu ne’e realize hafoin nia hetan bola pasa husi jogador Sebastião P. do Santos (34). Durante jogu primeiru parte ne’e lao, ekipa Timor-Leste esforsu maka’as maibe la iha oportunidade ba sira atu hatama tan golu, maibe to’o jogu primeira parte remata pozisaun nafatin 1-0.
Hafoin deskansa minutu 15, jogu ba segundu parte foin liu minutu ida, minutu da-46, jogador ida husi ekipa Malaysia, Mohammad Syazwil Hossain (15) konsege balas golu ida halo pozisaun 1-1.

Maske nune’e ekipa husi TL kontinua esforsu hatudu sira nia jogu, dezenvolve bola hakarak manan. Nune’e mos ekipa Malaysia nian lakohi lakon. To’o iha minutu 59 jogador ekipa Malaysia konsege hatama tan golu ida sai 2-1. Iha minutu 63 jogador no 8 Muhammad Hafizuddin Mohd Nizam husi Malaysia kontra regra jogu iha linha 16 hodi fo oportunidade ba ekipa TL hodi marka penalty. Jogador numeru 19 nebe hetan fiar tebe penalti konsege ezekuta bola ho diak hodi halo pozisaun golu 2-2.

Ho pozisaun impata ne’e, halo jogador parte rua hatudu jogu diak hodi harame estadiu halo adeptu (penonton) sira husi ekipa rua ne’e kontenti. Tama iha minutu 72, ekipa Timor Leste termina golu ida hodi manan iha jogu ne’e. Jogador numeru 19 husi ekipa TL konsege realiza tan golu ida valor 3-2 to’o jogu ne’e remata. Hafoin jogu remata treinador husi ekipa Malaysia Matdinos Talib ba jornalista sira liu husi koferensia imprensa hateten, jogu Tasa Asean Championship, ne’ebe halao iha Estadiu Municipal Dili ne’e diak. Nia apresia ekipa U-15 TL ne’ebe hatudu jogu kapas.

Nia haktuir jogador sira ne’e foin lalais hasoru iha Malaysia hatudu jogu abansadu teb-tebes. “Ami iha Malaysia baibain halao treinamentu iha lorokraik ho iklima ne’ebe malirin, maibe iha ne’e iklima diferensia, depois jogu halao iha tuku 4 lorokraik, iha oras ne’ebe loron sei manas entau jogador la toman ho iklima iha ne’e sira la tahan, ne’e mak sai hanesan impaktu hotu ba jogador sira,” treinador ne’e dehan.
“Ami hare ekipa rua ne’e hotu-hotu diak hatudu jogu ne’ebe kapas, maibe hau sente triste uituan ho penalti ne’ebe fo ba ami nia ekipa arbitu ne’ebe halai iha klaran la hatene to’o lasmen derpenti fo sala, afinal jogador iha hela nia fatin la halo reajen ruma ba jogador husi Timor Leste nian, satan jogador dook tamba saida mak fo fali penalti hau mos la hatene,” treinador ne’e lamenta.

Nia haktuir katan nia sei esforsu nune’e iha jogu ne’ebe tuir mai nia ekipa bele manan tamba sira sei iha tan jogu tolu. “Jogador TL jogador sira sai jogador ne’ebe diak hanesan jogador no. 19 nia fuik uituan moris I nia iha stamina ne’ebe sufisiente kualker bola eforsu atu hetan ida ne’e hatudu TL iha jogador ne’ebe diak,” treinador husi ekipa U-15 malaysia ne’e dehan. Parte seluk treinador ekipa U-15 TL Gaspar Quiantao da Silva hateten katak ekipa rua hatudu jogu ne’ebe diak ativu teb-tebes, ekipa U-15 husi Malaysia ne’e ekipa ne’ebe boot, maibe jogu ne’e ativu teb-tebes.

Nia dehan maske ekipa Timor-Leste manan, presiza hadia buat barak. Treinador buka atu hadia nafatin fallansu ne’ebe jogador sira halo. Hafoin ekipa U-15 TL manan ekipa Malaysia, treinador ne’e imforma agoradadauk ekipa TL iha pozisaun terseiru. Nia espera katak jogu rua ne’ebe tuir mai ekipa ne’e manan maka TL sei hetan primeiru lugar. “Ami sei prepara treinamentu ne’ebe espesifiku liu atu hasoru ekipa Thailandia, maske Thailandia foin lalasia manan ona ita. Ita hatene ekipa ne’ebe forte teb-tebes tamba ne’e ami sei treinu hodi fokaliu ba ekipa ne’ebe atu hasoru,” treinador ne’e dehan.

Bainhira husu kona ba jogu ne’ebe halao foin lalais ne’ebe la hetan partisipasaun husi Sekretarius Estadu Joventude no Desportu (SEJD). treinador ne’e la preokupa, maibe nia so husu deit atu bele fo oportunidade ba nia ekipa atu uza kampo estadiu munsipal para bele utiliza hodi treinu iha laran. Entretantu jogador Cornelis Nahak Portela hanesan jogador ne’ebe eskola iha Malaga, España nebe asiste jogu nee sente kontenti banhira akompania ninia kolega jogador ne’ebe hadudu jogu ne’ebe diak no fiziku ne’ebe diak to’o manan Malaysia.

Ho ida ne’e nia husu nafatin ba nini jogador maluk sira U-15 atu hatudu nafatin jogu ho esperansa nafatin atu bele foti nasaun TL nia naran liu husi jogu futebol. Durante jogu ne’e lao lidera husi arbitu Steve Suprecencia husi Filipina, Filomino da Silva no Pedro Maia lasmen husi TL. Durante jogu ne’e lao jogador nain rua mak hetan kartaun kinur, ida husi TL no ida seluk husi Malaysia. Jogu ne’e lao diak tamba hetan seguransa masimu husi PNTL no Polisia Militar. (Rony)